भलाकुसारी बालकविता
रमेशचन्द्र घिमिरे
प्रश्न ः ‘खान पनि हुन्छ साथी टेक्न पनि हुन्छ
उस्तै परे कम्पारामा सेक्न पनि हुन्छ’
उत्तर ः मीठो मानी खाऊ तिमी लौरो ठानी टेक
प्रश्न ः तिमीलाई यौटा प्रश्न सोधिरा’छु मैले
‘गोरु म¥यो कैले–कैले डुक्रँदैछ ऐले’
उत्तर ः भनूँ भने रिसाउँछौ कि तिमी रै’छौ ब्याङ्ग्रो
सुन, सुन मेरो साथी यसको उत्तर ढ्याङ्ग्रो
प्रश्न ः ‘खाँदाखेरी मीठो हुन्छ पकाउन गाह्रो
हाल्दाचाहिँ गीलो हुन्छ झिक्दा हुन्छ साह्रो’
उत्तर ः पानी राख थोरै–थोरै धेरै राख पिठो
रोटीबाहेक अरू के छ खाँदा हुने मीठो
प्रश्न ः मेरो साथी ट्वाल्ल पर्छौ यता–उता हेरी
‘मलाई नै देख्न पुग्छु उसलाई हेर्दाखेरी’
उत्तर ः ‘हीरा होइन टल्कन्छ त्यो पर्खाल होइन छेक्छ’
ऐना हेर्न खोज्छ जसले आफूलाई पो देख्छ
प्रश्न ः ‘कपडाको छाला रै’छ फलामको हाड
खुम्चँदा चैँ लठ्ठी हुने खुल्दा हुने आड’
उत्तर ः यत्ति पनि थाहा नपाउने तिमी रै’छौ लाटा
बिस्र्यौ क्या हो पानी पर्दा ओढ्नुपर्ने छाता?
No comments:
Post a Comment