 |
| गङ्गाराम रिजाल |
झ्याउरे वेदना
हातका मैला सुनका थैला
के गर्नु धनले ?
के गर्नु धनले ?
घरैमा बसौँ परिवारभित्र
आनन्दी मनले ।
आनन्दी मनले ।
साथी-भाइ भेट्ने उत्कट हुन्छ
यो इच्छा जाहेर !
यो इच्छा जाहेर !
विश्वमा भयो यो हाहाकार मानव जातिमा ।
यो बज्रपात पर्नाले ठूलो घाउ भयो छातीमा ।
कोरोना आयो बिनासै गर्ने कसरी भगाऊँ ?
मनको घाउ बिसेक पार्ने कुन मलम लगाऊँ ।।
कसैका थिए कलिला मुना सन्तति घरमा !
बाबा र आमा नहुँदा कसका बस्नेछन् भरमा ?
कसैको महल रित्तो भो होला दैव नै लागेर !
यो प्राण धान्न गाह्रो भो अब कहाँ जानु भागेर ?
हावा र बाढी, भूकम्प आई पारि गाउँ गएको !
दैवको पीडा मानवमाथि अति नै भएको ।।
इन्टरनेट् खोल्छु मनभित्रै बोल्छु रोकिन्छ प्रसङ्ग !
दैवको खेल दिनहुँ हेर्दा मन हुन्छ झसङ्ग !!
मुना र मदन बिछोड हुँदा जुन कथा लेखियो !
त्योभन्दा ठूलो मानवको आज वेदना देखियो !!
न्याउलको गीत भयो है आज सुनेर सकिन्न !
यो सारा विश्व हैरान हुँदा आँसु नै रोकिन्न !!
शान्तिको माला गाँसेर बस्नु घर दैलो कुरेर !
आशाको त्यान्द्रो अझै छ भेट्ने अर्को साल घुरेर !!
No comments:
Post a Comment