सुखी को...? (कविता)
 |
| मदन दुलाल फिलादेलफिया,पेन्सिलभेनिया अमेरिका |
अनन्त अन्धकारको गर्तमा
केही थान धोद्रा स्वर
साउती गर्छन्
साउती नम्बर १:-
सुखी को हो ?
उज्यालो ताज पहिरेर माथि आकाशमा
प्रज्वलित हुँदै गरेको जून ?
या
चुपचाप आफ्नो कक्ष परिक्रमा गर्दै गरेको सूर्य ?
कि
शान्त आकाश गङ्गा ?
साउती नम्बर २:-
सुखी को हो?
श्वेत जुहार पहिरिएर
नीलो आकाशको अधर चुम्न पाएका
धर्तीका वक्षस्थल ?
या
विशाल परिधिमा एक तमासले
जल प्रवाहको सङ्गीतमा मुग्ध अनन्त महासागर ?
कि
उष्णताको प्रखर ताड्ना बिच
फुलेको महा-मरू ?
साउती नम्बर ३:-
सु-साशनको छाती टेकेर
हुँकार गर्ने धृतराष्ट्र समय ?
या
चित्कारको दुन्दुभीबिच
फुलेको मुर्दाशान्ति ?
कि
बबण्डर बिचोबिच
प्रकाशीत मधुरो प्रकाश ?
साउती नम्बर ४:-
सुखी को हो ?
कर्तव्यको अगम पहाड
चडाँई गर्ने बलिष्ठ बाहु ?
या
वात्सल्यताको बिशाल परिधिमा
संसार रूलाउने काख ?
कि
वैराग्यको वीर्य
उत्सर्जन गर्ने बन्जड पहाड?
साउती नम्बर ५:-
सुखी को हो ?
यौवनले परिपूर्ण भएकै बेला
बोटमा फुली पाउमा मर्ने फूल
या
सुन्दर भैकन पनि अभिशप्त जिन्दगी जिउने पलाँस
कि
बिहानीको सुरम्यतामा रम्न नपाउने
पारिजात ?
हे अनन्तता !
के
दु:खी नहुनु
सुखी हुनु हैन र ?
No comments:
Post a Comment