सरस्वती श्रेष्ठ `सरू´को आमा खुसी छिन् बालकविता

बाल कविता

********** 

आमा खुसी छिन् 

--सरस्वती श्रेष्ठ `सरू´

काम गर्ने रमाउने 

यही सिकियो

दिमागबाट `अल्छी´ भन्ने

शब्द झिकियो

बाहिर-बाहिर डुलिन्थ्यो

चर्को घाममा

खेल्नमात्रै लागिन्थ्यो

अल्छी काममा

सधैँ गाली खाइन्थ्यो 

बाबाआमाको

वास्ता रत्ति लाग्थेन

घरको कामको

ऐले घरमै बसेर

काम सिकियो

दिमागबाट `अल्छी´ भन्ने

शब्द झिकियो

छोरो बिग्र्यो भनेर 

आमा दु:खी थिन्

सुध्रिएको बानीले

बल्ल खुसी छिन् ।

      - पोखरा